ТӨРӨЛХ НУТГИЙНХАА  ХӨГЖЛИЙН ТӨЛӨӨ  ХАМТДАА

 Баянбулаг сумын цахим хуудсанд зочилж орон нутгийн  байгууллагуудын талаар болон төрийн үйлчилгээ, хууль тогтоомж, шийдвэр, цаг үеийн мэдээ, мэдээллийг  цаг  алдалгүй хүлээн авч  байгаа таны  энэ өдрийн амар амгаланг айлтган мэндчилье.

Манай сум нь байгалийн баялаг,  ховор ховордсон ургамал, ан амьтан, үзэсгэлэнт болон түүх соёлын дурсгалт газар олонтой, байгалийн эрс тэс уур амьсгалтай, Төв Азийн өндөрлөг нутаг юм.

Уул тал, ус гол, үржил шим бүрэлдсэн Халзан хангай нутгийнхаа  эзэн нь болж төрсөн хэн бүхэнд хийж бүтээх, хэрэгжүүлэх, гүйцэтгэх ажил их  байгааг ухамсарлан нэгэн сэтгэлээр ард иргэдийнхээ аж амьдралыг дээшлүүлэн өрх бүрийн орлогыг нэмэгдүүлэн сум орныхоо хөгжил дэвшил,  ирээдүйг өөдрөгөөр төлөвлөн ажиллах нь төрийн захиргааны байгууллага төдийгүй нутгаа гэсэн хүн бүхний үүрэг юм.

 Цаашид сум орон нутгиийнхаа онцлогийг хадгалан түүн дээрээ тулгууурлан байгалийн баялагаа зүй зохистой ашиглаж, аялал жуулчлалыг улс, аймгийн аялал жуулчлалын сүлжээнд холбогдон мастер төлөвлөгөө боловсруулан хөгжүүлж гадаад дотоодын жуулчдыг татах нь төсвийн орлогыг нэмэгдүүлэх нэг гол эх үүсвэр болж байна.

Сүүлийн үед ган зудын давтамж  ойртож, байгалийн тэнцвэрт байдал алдагдаж, өнгөний ус ховордож, цөлжилт тодорхой хэмжээнд явагдаж байгаа нь малчдын боловсролыг нэмэгдүүлэх, өндөр ашиг шимтэй, байгалийн бэрхшээлийг даах чадвартай мал, фермерүүдийн аж ахуйг өсгөх, эрчимжсэн газар тариалан хослуулан хөгжүүлэх чиглэлд хөтлөж байна.

Улсын нийслэл Улаанбаатар хот болон бусад аймаг, хотуудад оршин суугаа нутгийн уугуул иргэд, эцэг өвгөдийн галаа манан суугаа нутгийн суугуул иргэд та бүхнийг ус нутгийнхаа хөгжил дэвшилд гар бие оролцож, шинийг санаачилж, дэвшлийг нутагшуулахын төлөө бидэнтэй хамтран ажиллахад энэхүү цахим сайт туслах болно.

Та бүхний маань юу санасан есөн цагаан хүсэл тань сэтгэлчилэн бүтэж, эрүүл энх явахын өлзийтэй ерөөлийг өргөн дэвшүүлье.  

БАЯНБУЛАГ СУМЫН ЗАСАГ ДАРГА Д.ПҮРЭВСҮРЭН